;

26 May 2013      Nanuka.     Views 2985    
Category: Fun, Interesting

ჩემპიონთა ლიგა მიუნხენის ბაიერნმა მოიგო!

25 მაისს, უემბლის სტადიონზე, ევროპის ყველაზე პრესტიჟული ტურნირის ფინალი გერმანული გუნდების - მიუნხენის ბაიერნსა და დორტმუნდის ბორუსიას შორის გაიმართა. მატჩის პირველ წუთებში დორტმუნდის ბორუსია უკეთ გამოიყურებოდა და ნოიერის კართან უამრავი საგოლე მომენტიც შექმნა, მაგრამ ბაიერნის მეკარემ ძალიან დამაჯერებლად ითამაშა და საბოლოოდ 1-ლი ტაიმი გოლის გარეშე დასრულდა. მე-2 ტაიმში ბაიერნი აშკარად ჯობნიდა დორტმუნდს, რაც მე-60 წუთზე რობენის საოცარი პასის შემდეგ მანჯუკიჩის გოლით დასრულდა. ზუსტად 5 წუთის შემდეგ, ბაიერნის საჯარიმოში შესული როისის წინააღმდეგ უხეშად ითამაშა დანტემ, რის გამოც არბიტრმა დორტმუნდელთა სასარგებლოდ თერთმეთმეტრიანი დანიშნა. დარტყმა გიუნდოგანმა ზუსტად შეასრულა - ანგარიში გათანაბრდა 1:1.

მომდევნო 20 წუთის განმავლობაში მიუნხენელებმა ბევრი რეალური მომენტი შექმნეს, რომელთაგან განსაკუთრებული იყო 71-ე წუთზე მიულერის მიერ საჯარიმოში შესვლა და ბურთის რობენისთვის გადაცემა, რის შემდეგაც გოლი გარდაუვალი ჩანდა რომ არა დორტმუნდელთა მცველის, სუბოტიჩის საოცარი თამაში, რომელმაც თავისი გუნდი აშკარა გოლისგან იხსნა. მატჩის ძირითადი დროის დასრულებამდე 1 წუთით ადრე, რიბერის პასის შემდეგ, რობენი დორტმუნდელთა მეკარესთან ერთი-ერთზე აღმოჩნდა, გადამწყვეტ მომენტში გუნდი არ დააღალატა და... ანგარიშით 2:1 მიუნხენის ბაიერნი ევროპის საუკეთესო გუნდია!

ბაიერნი ჩემპიონია!

არიენ რობენი:

"დაუჯერებელია. ძალიან ბედნიერი ვარ. ვფიქრობ, რომ ძალიან რთულია აღვწერო ის გრძნობები, რომელსაც ახლა განვიცდი, თუმცა მე ძალიან ამაყი ვარ, ამაყი ვარ, რომ ვარ ამ გუნდის ნაწილი. და დიახ, ბოლოს და ბოლოს ჩემპიონთა ლიგის მოგება, ეს ახდენილი ოცნებაა. ამას ვერ აღწერ - უამრავი ემოცია გიტრიალებს თავში, განსაკუთრებით მაშინ, როდესაც იცი რას ნიშნავს წაგება. ვფიქრობ, ახლა უფრო მეტად შეგვიძლია ვისიამოვნოთ ამ ტიტულით.

უნაკლო სეზონია, რომელსაც იქით კვირაში დავასრულებთ. თუ მოვიგებთ გერმანიის თასს, მოვიგებთ ამ სეზონის ყველა ტიტულს, რაც ჩვენი მიზანია. მიუხედავად ამისა, გუშინდელი საღამო მაინც ყველაზე მნიშვნელოვანი იყო.

ფეხბურთი გუნდური სპორტია და ჩვენ ყველაფერს ვაკეთებთ, როგორც გუნდი, მაგრამ როგორც ფეხბურთელისთვის ეს წარმატების პიკია, უმაღლესი რამ, რასაც შეგიძლია მიაღწიო. მსაჯის სასტვენი და შენ იცი, რომ ხარ ჩემპიონთა ლიგის გამარჯვებული - ბევრი ბაიერნის ფეხბურთელისთვის ეს ერთადერთი რაღაცაა, რაც ენატრებოდა. შარშანდელი და 2010 წლის იმედგაცრუებების შემდეგ და ჩემთვის მსოფლიო ჩემპიონატზე დამარცხების შემდეგ - ეს უკვე სამი ფინალია და არავის სურს ჰქონდეს წაგებულის სახელი. როგორც იქნა, ჩვენ გამოგვივიდა დღეს და ახლა შეგვიძლია დავივიწყოთ სხვა რაღაცები.

ყოველთვის განვიცდი დიდ პასუხიმგებლობას, როდესაც ფეხბურთს ვთამაშობ, რადგან ეს გუნდური თამაშია. ჩვენ მივაღწიეთ ფინალს, რადგან ნამდვილი გუნდი ვართ, ჩვენ ერთმანეთისთვის ვიბრძვით, ერთმანეთისთვის დავრბივართ. დაცვის მხრივ, ამ სეზონზე დაუჯერებლად ძლიერები ვიყავით, რადგან გვყავს ფეხბურთელები, რომლებსაც ბევრი რამის შეცვლა შეუძლიათ. დღეს მე გავიტანე გოლი, მაგრამ ამისთვის მთელ გუნდს უნდა გადაუხადოთ მადლობა. მეამაყება, რომ ამ გუნდის ნაწილი ვარ".

ბაიერნი ჩემპიონია!

მიუხედავად იმისა, რომ წლევანდელი ჩემპიონთა ლიგის ტრიუმფატორი ბაიერნი გახდა, დიდი პატივისცემის ღირსია დორტმუნდის ბორუსიაც, რომელმაც საოცარი სეზონი ჩაატარა და ნახევარფინალში ისეთი დონის გუნდი დაამარცხა, როგორიც რეალ მადრიდია! გთავაზობთ გუნდის რამდენიმე წამყვანი ფეხბურთელის კომენტარს გუშინდელ მატჩთან დაკავშირებით.

ჰუმელსი (მცველი): "რა თქმა უნდა, ძალიან დამწუხრებულები და იმედგაცრუებულები ვართ. შეგვეძლო ჩემპიონთა ლიგის ეს წელი წარმატებით დაგვესრულებინა. ამ თამაშისთვის უნაკლო ფორმაში ვიყავით, მაგრამ გავუშვით შანსი, რომ პირველებს გაგვეტანა გოლი, რაც მეტ თავდაჯერებულობას შეგვძენდა. 1-1-ზე, უკვე დამატებით დროზე დავიწყეთ ფიქრი, მანამ სანამ 90-ე წუთი არ მოვიდა"

ვაიდენფელერი (მეკარე): "ატმოსფერო ძალიან ჩუმია, არავინ ლაპარაკობს, რაც ვფიქრობ, რომ ნორმალურია. ჩვენ ძალიან იმედგაცრუებულები ვართ, მაგრამ გვეამაყება ის, რასაც მივაღწიეთ და ის, რაც ვაჩვენეთ მთელი ჩემპიონთა ლიგის სეზონის განმავლობაში, განსაკუთრებით კი დღეს. ჩვენ მოვახერხეთ ბაიერნის დონეზე თამაში და გვქონდა შანსი მატჩი ჩვენს სასარგებლოდ დაგვესრულებინა".

სუბოტიჩი (მცველი):
"რა თქმა უნდა, არავინ არის ბედნიერი. პირადად მე, ვფიქრობდი რომ რაღაც განსხვავებულის გაკეთება შემეძლო, მაგრამ რაც მოხდა ის უნდა მივიღოთ. საოცარი მატჩი იყო ორი კარგი გუნდის მონაწილეობით და ყველას საკუთარი შანსი ჰქონდა, მათ შორის ჩვენც. ნამდვილად არასწორი იქნება იმის თქმა, რომ ბაიერნი არ იმსახურებდა მოგებას - ისინი ნამდვილად კარგ ფორმაში იყვნენ".


ბაიერნი ჩემპიონია!

გუშინდელი მატჩის შემდეგ, მიუნხენის ბაიერნის ლეგენდარული მწვრთნელი - იუპ ჰაინკესი გახდა მე-4 მწვრთნელი, რომელსაც ჩემპიონთა ლიგა 2 სხვადასხვა გუნდთან ერთად აქვს მოგებული. ჰაინკესამდე ეს შეძლეს მხოლოდ ერნსტ ჰაპელმა, ჯოვანი ტრაპტონმა და ჯოზე მოურინიომ. თუ 1 კვირის შემდეგ ბაიერნი შტუტგარდს დაამარცხებს, იგი გახდება პირველი გუნდი, რომელიც 1 სეზონში სამივე ტურნირს მოიგებს.

ბაიერნი ჩემპიონია!

მე კი, ყველა ბაიერნის ფანს ვულოცავ ამ ბრწყინვალე და დამსახურებულ გამარჯვებას!
ბაიერნი ჩემპიონია!


Category: Fun, Interesting
Tags:

Share it
Comments



Welcome to ANGEL.GE

at our web page you can see the latest top newses about fashion world, street styles, trends, street styles, films, quotes and many other interesting things...

some articles are translated to English via google.com

ANGEL.GE ინსტაგრამზე - Instagram

Back to Top